ليش عم تجي متأخّر عالقداس؟
ظاهرة عجيبة غريبة ما عم لاقيلها حل
نسبة مش قليلة من العالم بتجي بعد قراءة الانجيل المقدس
هاي اذا ما اجو بعد الوعظة
واذا كان في قداس وجناز، بيجو بآخر القداس حتى ياخدو بالخاطر ويقدموا التعازي للعيلة المحزونة
بيقول الرب على لسان النبي هوشع
“قَدْ هَلَكَ شَعْبِي مِنْ عَدَمِ الْمَعْرِفَةِ. لأَنَّكَ أَنْتَ رَفَضْتَ الْمَعْرِفَةَ أَرْفُضُكَ أَنَا حَتَّى لاَ تَكْهَنَ لِي. وَلأَنَّكَ نَسِيتَ شَرِيعَةَ إِلهِكَ أَنْسَى أَنَا أَيْضًا بَنِيكَ.” (هو 4: 6).
شو جاي تعمل بالكنيسة انت اللي جاي بعد قراءة الانجيل المقدس؟
اذا كلام الله ما سمعتو وما بدك تسمعو، شو جاي تعمل؟
شو الزوادة الروحية والاخلاقية والانجيلية اللي اخدتها اذا جيت بعد الانجيل؟
بفكرك ريّحت ضميرك وفرجيتو لله انك جيت عالكنيسة؟
عم تضحك على حالك او عم تضحك على ربك؟
وأنت اللي جاي تعزي وجاي بآخر القداس بس حتى تعزي
الافضل تروح لعندون عالبيت تعزيهون من انو تيجي عالقداس متأّخر
لأن القداس هو حتى نصلي من أجل راحة نفس المرحوم
ونطلب من الرب التعزية للعيلة
اي مسيحيين نحنا؟
نحنا عنجد مؤمنين؟ عنجد منحب يسوع المسيح؟
نحنا مسيحيين وثنيين، لا بل الوثنيين احسن منا
بيقول الرب يسوع: العشارون والزناة يسبقونكم الى ملكوت الله
اوعى تتحجج وتبرر بحجج لامنطقية واساساً انت مو مقتنع فيها
بدعيك اليوم توقف قدام حالك وتسأل نفسك
انا فعلاً مسيحي؟ انا فعلاً بصلي؟ انا فعلاً بحب يسوع؟
انا عم انقل الايمان لاولادي؟ انا عم كون شاهد امين ليسوع المسيح؟
كيف بتتجرأ تقرّب عالمناولة وانت ما سمعت الانجيل المقدس كلام الله؟
كيف بتتجرأ تتناول القربان المقدس وانت بحال الخطية
ومانك طالب الرحمة والغفران من لما عملت اول قربانة؟
كيف بتتجرأ تحط القربان المقدس على لسانك ولسانك مليان مسبات وكفر وحكي عالعالم ونميمة وافتراء وطق براغي للعالم؟
كيف بتتجرأ تعيش ساعة مسيحي وساعة وثني؟
انا ما عم دينكون ولا عم حاسبكون ومين انا حتى احكم عليكون
انا كمان بشر خاطي بحاجة لرحمة وغفران الرب
لكن رسالتي ودوري ككاهن وكأب روحي وعّيكون على الميراث الالهي
اللي عطانا ياه الرب يسوع: القداس الالهي سر حضور المسيح بحياتنا.
لما ببلش القداس الالهي بتنفتح السماء وبيحضر الرب يسوع والعدرا مريم وكل القديسين والملائكة ورؤساء الملائكة
وكمان بتكون حاضرة نفوس موتانا المتعطشى للصلاة
بالقداس الالهي المسيح بيكون حاضر فعلاً وحقيقة بالكاهن
وبتصير الكنيسة السماء على الارض
بعد بدك تتأخر عالقداس؟ او بعد بدك تغيب عالقداس؟
انت حر والقرار بايدك
والله معكون
ابونا فادي عطاالله
