عدس وبيض – قصة وعبرة

عدس وبيض 

قالت الفتاة .. كنت عايشة مع جدتي .. ايام كتير كان يمر علينا ظروف صعبة .. مافيش فلوس .. مثلا خالي لم يرسل نقود هذا الشهر .. عادي مثل كل البيوت يأتى وقت مافيش..
لم أعرف جدتى بتتصرف ازاي .. ولا عندي فكرة!!

فى أحد الأيام كيس فلوسها اتسرق في السوق وهو كل ما نملك .. لا يوجد في البيت كله غير 5 جنيه !!
بصراحة وهي بتبص في الدولاب عنيها دمعت لدقيقة كده.. وبعدين عملت حاجة كانت هتجنني !!
قالتلي انزلي اشتري ربع كيلو عدس .  وعشر بيضات!!

نزلت وانا فاكرة ان ده اكل لينا .. بس هي اخدت العدس طبخته وعملته حلو قوي ريحة الزبدة كانت طالعة منه .. وسلقت البيض وحطت معاه ورقة فيها ملح وفلفل وسخنت كام رغيف كانو عندنا .. وخدت ده كله ونزلت الشارع ادته لجماعة غلابة!!

كنت هتجنن .. واقلولها طب كنتي سيبيلي بيضة .. انتي مش بتحبيني قالتلي اصبري شوية !!

وخدتني وطلعنا البيت كنا وقت قبل العصر.. نمنا شوية.. وصحينا علي خبط جامد علي الباب !!
واحد صاحب خالي رجع من السفر.. وجايبلنا معاه فلوس وحاجات كتير حلوة

عشر دقايق عدو كمان .. والباب خبط تاني
ولد من اللي بيقعدو في السوق قالها ان كيس الفلوس بتاعها وقع قدامه ومكانش يعرف بيتها!!

يومها جدتي قالتلي .. اللقمة تزيح النقمة .. كل ما تضيق بيكي .. وتجدى روحك مخنوقة .. اطعمي فقير ولا محروم

طيب لماذا العدس يا ستى .. قالت .. انا اعملته للناس عشان انا بحبه !!

قدمي للناس من اللقمة اللي تحبيها .. يقوم ربنا يحلي زادك ويفك كربك..

جدتي في الشتاء كانت بتسلق بيض وتوزعه سخن علي عساكر المرور اللي بيقفو في الشارع وعمال النظافة

والله ما شفت متعة اكتر من اني اعمل اكل بإيدي واقدمه لحد .. جربوها وانتو مخنوقين .. وهتتفاجئو من النتيجة..

ألقي خبزك علي وجه المياه وسوف يأتي ولو بعد حين